ގދ. ފިޔޯރީ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް ފަށައިފި

ގދ. ފިޔޯރީ ބަނދަރު ތަރައްޤީ ކުރުމުގެ މަޝްރޫޢުގެ އަމަލީ މަސައްކަތް މިއަދު ރަސްމީކޮށް ފަށައިފިއެވެ. މި މަޝްރޫޢުގެ މަސައްކަތް ފައްޓަވައި ދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްތަލިބް އާއި އެމްޓީސީސީގެ އެމްޑީ ޑީސީޕީ (ރިޓަޔަރޑް) އަޙްމަދު ސަޢުދީއެވެ. 

މި މަޝްރޫއަށް 38 މިލިއަނައްވުރެ ގިނަ ރުފިޔާ ހަރަދުވެއެވެ. މި މަޝްރޫޢުގެ ދަށުން، އައު ބަނދަރު ފުންކުރުމާއި، ރިވެޓްމެންޓް ޖެހުމާއި، އެއްގަމުތޮށި ޖެހުމާއި، ބަނދަރުގެ ނެރު ބައްތިއާއި މަގު ބައްތި ޖެހުމަށް ހަމަޖެހިފައިވެއެވެ.

ފިޔޯރީގައި މިއަދު ހަވީރު 4:30 ގައި ބޭއްވުނު މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޑރ. މުއްތަލިބް ވިދާޅުވީ ފިޔޯރީ ބަނދަރު ތަރައްޤީކުރުމުގެ މަޝްރޫޢު ނިމޭއިރު ޒަމާންތަކެއް ވަންދެން ރަށުގެ ރައްޔިތުން އުފުލަމުންދިޔަ ލަފާފުރުމުގެ ދަތިކަމަށް ދާއިމީ ހައްލެއް ލިބިގެން ދާނެކަމަށެވެ.

އެމްޓީސީސީގެ މެނޭޖިންގ ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް ރިޓަޔަރޑް އަޙްމަދު ސަޢުދީ ވިދާޅުވީ، އެމްޓީސީސީއާ މަޝްރޫޢު ހަވާލުކޮށްފައިވާ މުއްދަތުގެ ތެރޭގައި މަސައްކަތް ޕްލޭނާ އެއްގޮތަށް ނިންމާނެކަމަށެވެ. 
މި މަޝްރޫއަށް އަމަލީ ސިފަ ގެނައުމަށް މަސައްކަތް ކުރެއްވި އެންމެހާ ފަރާތްތަކަށް ކައުންސިލްގެ ނާއިބް ރައިސާ އާމިނަތު އައިވީނާ ވަނީ ޝުކުރުއަދާކުރައްވާފައެވެ.